Hona hemen Gorka Juliok 2017-2018 ikasturtean HEZikt graduondokoaren bosgarren moduluko Jendartea eta hezkuntza: Aukerak izeneko ikasgaiari buruz egindako sintesia.

Bosgarren moduluko hirugarren gai honetan, hiru blokeetan zehar IKTen erabilerak hezkuntzan izan ditzakeen zenbait kontzeptu, praktika, gomendio eta eztabaida landu ditugu. Moduluaren helburua, teknologiak eskaintzen dituen aukerak era kritikoan aztertzeko mekanismoetan sakontzean datza, aukera hauek baliatu ahal izateko ezinbestekoa dena. Marko orokor kontzeptual batetik hasi, ahalduntze teknologiko integralerako gako batzuk aztertuz, zenbait teknologiek egiten duten ekarpena adibide bidez etorkizunera proiektatuz.

Hezkuntza komunitatean, parte hartze komunitateak eraikitzeko behar etengabea da. Prozesu gehienak, komunitate horietan kanpoan zein barrurako komunikazioa eta teknologiaren papera zein izan behar duen definitzeko garaian duda asko sortzen dira. Horretarako kontutan hartu beharko, partaidetza lantzeko marko orokorra osatzeko aurretik zenbait kontzeptu ezagutu eta horiei denei zentzua ematen dion marko orokorra aurkeztu dugu.

• Partaidetza komunitatea: partaide izango direnen komunitatea.
• Konpromiso mailak: partaideek beren artean ezarriko dituzten konpromiso mailak.
• Komunikazio motak: partaideen artean erabiliko diren komunikazio motak.
• Bitartekaritza ereduak: sustatuko den partaideen arteko bitartekaritza ereduak.

Ondoren aukera bezala, hezkuntza prozesuetan ahalduntzea bilatzen dela kontutan hartuz, hori lortzeko eman behar den ezinbesteko ezaugarritako bat autonomia dela ikusi dugu. Arlo teknologikoa eta hezkuntza loturik, autonomia hori eskuratzen laguntzeko, hiru arlotako sailkapen baten bidez, autonomia hori lantzeko lagungarri izan daitezken tresna edo baliabideak errepasatu ditugu.
Amaitzeko sarean aurki daitezkeen baliabideak erabiliz hainbat gai nola ikasi/irakatsi daitezkeen landu dugu: irudi digital libreekin lan egin, web teknologiak, programazioa, gailu libreak…
Osatzeko markoa elikatzen duten bideo eta hainbat erreferentzia landu ditugu, saio presentzialean sakonduko ditugunak.

Hona hemen Nere Amenabarrek 2017-2018 ikasturtean HEZikt graduondokoaren bosgarren moduluko Jendartea eta hezkuntza: Hezkuntza esku-hartzea Interneteko arriskuen aurrean izeneko ikasgaiari buruz egindako sintesia.

Bosgarren moduluko bigarren gai honetan, aurreko gaian (5.1 gaian) ikusi dugun moduan, ikusi dugu arriskuak egon badaudela Interneten ere. Horregatik hain zuzen ere, esku-hartze zuzen bat egitea ezinbestekoa da gure ustez. Funtsezkoa izango da esku-hartze hau bai eskolan baita familietan ere.
Esku-hartze horren beharra ikusteko jauzi digitalari eskaini diogu ataltxo bat. Denetariko iritziak edota pertzeptzioak jaso ditugu: batzuk jauzi txikitu dela, besteak handitu, beste batzuk zalantza… Gai honekin oso erlazionaturik dagoen ideia hauxe da nire ustez: jauzia handituz edota txikituz joan arren, zein da gazte hauek Interneten sor daitezkeen aurrean duten arriskuen pertzeptzioa? Hori da niretzat esanguratsua den zerbait.
Ikastetxeetan dauden arautegiei dagokienean, egun ikastetxe askotan daude IKTen inguruko arautegiak eta nolabaiteko esku-hartzeak. Ikusi dugunaren arabera, arau guzti hauek hezkuntza estilo desberdinei erantzuten diete: autoritarioa (kontrol +, maitasun-), babeslea (kontrol +, maitasun +/-), permisiboa (kontrol -, maitasuna +/-) eta asertziozkoa. Adibide mordoa aurkituko dugu sarean, baina gai honetan bi proposatu dizkizuegu: Deustukoa eta Santo Tomas lizeokoa. Nire iritziz lanketa polita dugu oraindik ere arlo honetan egiteko. Ikastetxe bakoitzak bere beharrei erantzunez sortzen du arautegia baina agian ez litzateke txarra izango arautegi orokor bat izatea, eta gero bakoitzak berera moldatzea.
Euskaltel enpresaren iragarki bati ere eskaini diogu tartea. Zuen iritziak hor nahiko desberdinak izan dira. Dena den, nire iritziz, helburu komertzial bat duela ahaztu gabe, bertan agertzen diren ideiak erabilgarriak izan daitezke gaiaren lanketa egiterako momentuan. Telefonoa eman eta kontratua sinatzearekin ez dela nahikoa ez dago inolako zalantzarik. Baina kasu batzuetan, telebistak duen indarraz aprobetxatuz, honen inguruan hitz egiteko aukera polita izan daitekeela iruditzen zait.
Hurrengo atalean gomendioei buruz aritu gara. Alde batetik eskolarako aproposak izan daitezkeenak eta beste alde batetik familientzat. Dudanik gabe, bi eremu hauek bat egitea ezinbestekoa da mezua berdintsua edota antzekoa izateko, batzuetan hain zaila izan arren. Familientzat 12 gomendioz osaturiko aurkezpen bat ikusi dugu. Gehiengoen esanetara gomendio egokiak izan dira, nahiz eta batzuek luzeegiak diren aipatu duzuenean. Agian beste era batetara taldekatu daitezke?
Azken atalean berriz, labur labur bada ere dauden baliabide eta programei eskaini zaie tartea. Horretarako adibide desberdin batzuk ikusi ditugu hasieran eta jarraian unitate didaktiko bat egin behar izan duzue zuek aukeraturik gai bati buruz. Gaiak anitzak izan dira eta guztiak jaso eta irakurri ditut gustura: kontaktuak nola kudeatu, morroi ez izaten ikasi, besteen argazkien gainean dugun boterea,… guztiak interesgarriak eta ekarpen politak izan dira niretzat.
Bukatu da gure gaiari dagokion astean, baina aurrez aurrekoan izango dugu tartea gai hauen inguruan ere zuekin aritzeko. Beraz, datorren aste arte!

Hona hemen Aitziber Iturricastillok 2017-2018 ikasturtean HEZikt graduondokoaren laugarren moduluko Hizkuntza irakaskuntza on-line izeneko ikasgaiari buruz egindako sintesia.

Laugarren moduluko bigarren gaiaren hasieran saio sinkronoen ezaugarriak aztertu ditugu eta dauden aukeren arteko aldeen hausnarketa egin dugu. Ideia batzuk errepikatu ditugun arren, kameraren erabilpenaren helburu ezberdinak, edonondik egin daitezkela, mintzamena baino gehiago lantzeko aukera ematen digutela eta i(ra)kasle rolen aldaketa kasu, zenbait ideia desberdin ere aipatu dituzue:

• Kameraren erabilerak komunikazioaren abiaduran izan dezakeen eragina.
• Keinuek hizkuntzaren gabeziak estal ditzaketela
• Garraio eta material kostuen murrizketa

Horrez gain, foroetan aipatu den ideia bat nabarmentzekotan, saioen grabaketa eta ondoren grabatutakoa lantzearen helburu edo aukerak nabarmenduko nuke.
Saio sinkronoak egin dituzue gero, hartutako erabakiak desberdinak izan dira, batzuek txata soilik erabilita egin dituzue eta besteek deia eginda. Biak ala biak egokiak helburuen arabera.

Hona hemen Mikel Larrañagak eta Itziar Aldabek 2017-2018 ikasturtean HEZikt graduondokoaren laugarren moduluko Materiala sortzeko estrategiak eta baliabideak izeneko ikasgaiari buruz egindako sintesia.

Laugarren moduluko hirugarren gaian ahozko zein idatzizko komunikazioa lantzeko materiala sortzeko baliabideak eta estrategiak landu ditugu. Alde batetik, estandarraren erabilera eta baliabide biltegiak ikusi ditugu. Sortutako materialaren berrerabilgarritasuna ahalbidetzen duten SCORM eredua eta QTI estandarra ikusi ditugu. Gainera, sortutako materiala partekatzeko erabiltzen diren baliabide biltegiak aurkeztu ditugu.

Bestalde, hizkuntzaren tratamendu automatikoak materialen sorkuntzan nola lagundu dezakeen ikusi dugu. Irakasle zein ikasleek euskara lantzeko eskuragarri dituzten hizkuntza baliabideak ikusi ditugu.

Jardueren bitartez kontzeptu teorikoak praktikan jarri dituzue. Gaian landutako tresnak era ezberdinetan erabili dituzue moduluko azken produktuari begira. Ataza interesgarriak eta ikasleentzat erakargarrriak sortu dituzue, hezkuntzak ez duela aspergarria izan behar erakutsiz. Azkenik, ondoko kasuetan egindako esfortzua azpimarratu nahiko genuke:

• Aurrez aurreko saioetan SCORM eta QTI erabili ahal izateko egin duzuen saiakera.
• Gaian zeneukaten materiala begiratzeaz gain egin duzuen sakonketa eta ikerketa lana.
• Material osagarria aztertu eta euskararen tratamendu automatikoak material sorkuntza erdi-automatikoan nola lagundu dezakeen aztertu izana.

Hona hemen Hiart Legarrak 2017-2018 ikasturtean HEZikt graduondokoaren laugarren moduluko Hizkuntzen i(ra)kaskuntza: marko teoriko orokorra izeneko ikasgaiari buruz egindako sintesia.

Hizkuntzak i(ra)kasteko hainbat metodo daudela ikusi dugu (metodo tradizionalak, ikuspegi komunikatiboa…). Dena den, ezin dugu esan baliozko ikuspegi metodologiko bakarra dagoenik; ez dago ikasle guztientzat eta testuinguru guztietan balio duen metodorik.

Gainera, teknologia berrien eraginez, hizkuntzak i(ra)kasteko modu berriak (b-learning, e-learning…) zabaltzen ari dira.

Irakasleen erronka nagusia da hizkuntzak i(ra)kasteko metodologia eraginkorra eta baliabide teknologiko aproposak uztartzea. Horregatik, irakasleek denbora hartu behar dute metodologia ezberdinak zein teknologiak eskaintzen dituen baliabide eragingarriak ezagutzeko eta baliatzeko. Era berean, garrantzitsua da ikasleek ikas dezaten sareak eskaintzen duen informazio guztia ondo kudeatzen eta erabiltzen.

Gai honetan hizkuntzen i(ra)kaskuntzarako erabilgarri diren hainbat IKT baliabide ikusi ditugu, baita beste batzuk partekatu ere (1.1 jardueran IKT baliabide gehiago zerrendatu dira, guztion artean). Ondoren, ikastunitate bat sortzeko saiakera egin da, metodologia eta baliabide horietako batzuk bateratuta (1.2 jardueran idazmena lantzeko ikastunitate bat prestatu da, elkarlanean).